Хавдар судлалын үндэсний төвийн Удирдлагын баг, цэргийн насны эмч, эмнэлгийн ажилчдын эх оронч үзэл хүмүүжлийг төлөвшүүлэх, МУ-ын Зэвсэгт хүчнээс дэлхийн энх тайван, аюулгүй байдалд оруулж байгаа хувь нэмрийг таниулах, НҮБ-ын гишүүн орны хувьд дэлхийн халуун цэгт энхийг сахиулах үүрэг гйцэтгэж байгаа цэргийн ажиглагч, багийг сурталчлах, бие бялдрын хөгжил, тэсвэр хатуужил, хурд хүч, авхаалж самбаа, багаар ажиллах ур чадварыг дэмжих, иргэн- цэргийн харилцааг бэхжүүлэх зорилгоор Зэвсэгт хүчний жанжин штабын стратегийн бодлого,төлөвлөлтийн газартай хамтран 2024 оны 1 дүгээр сарын 26-27 ны 1,5 өдрийн тусгай хөтөлбөр бүхий цэргийн анхан шатны бэлтгэл сургалтыг “Таван толгой” дахь олон улсын ЗХ-ний сургалтын нэгдсэн төвд зохион байгууллаа. Сургалтад ХСҮТ-ийн төрөл мэргэжлийн 36 эмч эмнэлгийн ажилчид амжилттай хамрагдсан.

Цэргийн бэлтгэл сургалтын үеэр Батлан хамгаалах талаарх хууль, бодлого, зорилт, Зэвсэгт хүчний болон НҮБ-ын Энхийг сахиулах үйл ажиллагаа, цэргийн алба хаах хэлбэрүүдийн талаар ЗХЖШ, Зэвсэгт хүчний сургалтын нэгдсэн төвийн багш нар тусгайлан лекцийн хичээл оров.

Мөн дадлагын үеэр цэргийн алба хаагч нэг бүрийн зэвсэг, хамгаалах  хэрэглэл, түүнтэй харьцах ур чадвар, буудлагын зэвсгийн бүтэц, аюулгүй ажиллагаа, шагайврын дасгал зэргийг үзүүлэн гаргах болон, биет хэлбэрээр таниулсан. Цэргийн алба хаагчийн жагсаалын бэлтгэл, төрийн далбаа туганд хүндэтгэл үзүүлэх, төрийн дуулал эгшиглүүлэх зэрэг үйл ажиллагаанд сургаж дадлагажуулав.

ХСҮТ-ийн хамт олны зүгээс тус ангид алба хааж байгаа цэргийн алба хаагчдад “Хорт хавдраас сэргийлэх” сургалт мэдээллийг өглөө.

Хамтран зохион байгуулсан сургалт, бэлтгэл амжилттай болж өндөрлөсөн бөгөөд сургалтыг зохион байгуулахад дэмжлэг үзүүлж ажилласан ЗХЖШ-ын удирдлага, ЗХЖШ-ын Стратегийн бодлого, төлөвлөлтийн газар, Зэвсэгт хүчний 311 дүгээр анги, Зэвсэгт хүчний сургалтын нэгдсэн төвийн багш нарт гүнээ талархаж байгаагаа илэрхийлье.