ХСҮТ-ийн хавдрын сэргээн засах тасгийн хамт олон 2024-2026 онуудад Олон улсын ротари байгууллага, Хүрээ Ротари клубын 70 мянган долларын санхүүжилт дэмжлэгтэйгээр тоног төхөөрөмжийн шинэчлэл, шинэ технологийг нэвтрүүлж байна. Энэхүү төслийн хүрээнд өндөр эрчимтэй лазер эмчилгээ (High Intensity Laser Therapy), соронзон орон эмчилгээ (Magnetic therapy), өндөр даралтат хүчилтөрөгчийн эмчилгээ (Hyperbaric Oxygen Therapy)-г нэвтрүүлж байгаа бөгөөд уг тоног төхөөрөмж нь жилд дунджаар 10000–12000 үйлчлүүлэгчдэд хавдрын эмчилгээний дараах сэргээн засах тусламж шаардлагатай өвчтөнд сэргээн засах тусламжийг үзүүлэх хүчин чадалтай юм. Хавдрын мэс засал, хими болон туяа эмчилгээний дараа үүсэх эдийн гэмтэл, архаг шарх, мэдрэлийн гаралтай өвдөлт (chemotherapy-induced peripheral neuropathy), булчингийн сулрал, хөдөлгөөний хязгаарлалт, туяаны хожуу үеийн фиброз, некроз зэрэг хүндрэлүүд нь өвчтөний амьдралын чанар, бие даан амьдрах чадварт ноцтой нөлөөлдөг. Иймд эдгээр эмгэг жамд чиглэсэн сэргээн засах өндөр технологийн тоног төхөөрөмжийг нэвтрүүлсэн нь практик ач холбогдолтой боллоо. Энэ удаагийн сайн үйлсийн эзэд болсон Олон улсын ротари байгууллагууд болон Хүрээ Ротари, Хангай Ротари клубийн нийт хамт олонд дахин чин сэтгэлийн талархал илэрхийлж, эрүүл энх, аз жаргал, ажил үйлсийн өндөр амжилтыг хүсэн ерөөе.