Нүүдэлчин соёл иргэншлийн олон мянган жилийн түүхтэй, эсгий ширмэл урлалын өв соёлыг орчин үетэйгээ зэрэгцүүлэн хөгжүүлж, сурталчилсан сонирхолтой өдөрлөг боллоо. “Эсгий шивүүр зураг- стресс бууруулах арга” гар урлалын сургалтад төвийн эмч, сувилагч, ажилтан болон хавдрыг даван туулагч, хэвтэн эмчлүүлэгч, үйлчлүүлэгч нар оролцож, эсгий дээр шивүүр зүүгээр зураг зурлаа. Музейн ажилтан, сургагч багш Тулга Мөнхтүвшин эсгий бүтээл, шивүүр зургийн тухай танилцуулга хийж, эсгий зургийн бүтээлүүдийн бичил үзэсгэлэнг дэлгэн тайлбарласан нь сонирхолтой, оролцогчдыг идэвхижүүлсэн үр дүнтэй сургалт болсон юм. Биднийг дэмжин ажиллаж буй Байгалийн түүхийн музей /Natural history museum Боловсролын хөтөлбөр – Байгалийн түүхийн музей хамт олонд нийт ажилчид, үйлчлүүлэгч нарынхаа өмнөөс талархал илэрхийлье.

Хавдар судлалын үндэсний төв нь БНСУ-ын Yonsei University-н Wonju College of Medicine болон KOFIH олон улсын байгууллагатай хамтын үйл ажиллагаагаа эхлүүлсэн билээ. Сүүлийн 3 жилийн хугацаанд ХСҮТ-ийн 1 эмч, 4 сувилагч Солонгос улсын КOFIH сангийн тэтгэлгийг авч, 2 нь Сөүлийн их сургуульд суралцаж байгаа бол, 3 нь Ионсей их сургуульд сувилахуйн ухааны магистрыг хамгаалж ирээд, сурсан мэдсэнээ хэрэгжүүлэн ажиллаж байна. Энэ удаад ХСҮТ-ийн үйл ажиллагаа болон өөрийнх нь сургуулийн төгсөгчид хэр ажиллаж байгаатай танилцах, цаашид дэмжих, чадавхижуулах, хамтарч ажиллах чиглэлүүдийн талаар санал солилцохоор Ионсей их сургуулийн сувилахуйн захирал, профессорууд болон Солонгосын олон улсын эрүүл мэндийн сангийн төлөөлөгч нар хүрэлцэн ирлээ. Төлөөлөгчид Хавдрын сувилахуйн эрдэм шинжилгээний хуралд оролцсон бөгөөд Монгол улсад хийсэн айлчлалын тухай мэдээлэл Солонгосын Discovery news сайтад нийтлэгджээ. Талууд хавдрын сувилахуйн тусламж үйлчилгээнд шинэ технологиуд нэвтрүүлэх, сувилагч нарын мэдлэг, ур чадварыг нэмэгдүүлэх, сувилагч солилцооны хөтөлбөр хэрэгжүүлэх хүрээнд хамтын ажиллагаагаа өргөжүүлнэ.

Хавдар судлалын үндэсний төвийн хөнгөвчлөх тасагт засвар хийх гээд хөнгөвчлөхийн өвчтөнүүдийг авахгүй байна гэсэн мэдээлэл сошиал орчинд гарсан байна. Яг одоогоор тус төвийн хөнгөвчлөх тасаг хэвийн ажиллаж байгаа бөгөөд одоогоор ямар нэгэн шалтгаанаар тасаг хаагдсан зүйлгүй байна. Харин ирэх долоо хоногоос засвар хийхтэй холбогдуулан хөнгөвчлөх орнуудыг тасгуудад хуваарилан тараах зохион байгуулалтын бэлтгэлийг хийж байна. Үүнтэй холбоотойгоор аймаг дүүргийн эмнэлгүүдэд өөрийн харьяаны хөнгөвчлөхийн өвчтөнүүдэд тусламж үйлчилгээг тасралтгүй хүргэх асуудлаар арга зүйгээр ханган, хамтран ажиллаж байгаа болно. Асуудлыг албан ёсны эх сурвалжаас тодруулж баталгаатай мэдээллийг түгээж байхыг хүсэж байна.