УЛСЫН “ЦАЦРАГ ТУЯА” эмнэлэг анх нээгдэхдээ үзлэгийн хоёрор, мэс засал, эмэгтэйчүүдийн 45 ортой нэгдсэн тасаг, туяа эмчилгээний кабинетууд зэрэг үндсэн тасаг нэгжтэйгээр зохион байгуулагджээ.
Эмэгтэйчүүдийн тасгийн анхны эмчээр их эмч Д.Дарь ажиллаж, эмэгтэйчүүдийн нарийн мэргэжлийн тусламж үзүүлж байжээ.
Энэ үед хавдар судлалын нарийн мэргэжлийн эхлэл тавигдаж байсан болохоор голдуу эмнэлэгт хэвтсэн хожуу үеийн хавдартай хүмүүст шинж тэмдгийн эмчилгээний тусламж үзүүлж, хорт хавдраас сэргийлэх, эрт илрүүлэх, үзлэг хийх, нарийн мэргэжлийн эмч мэргэжилтэн бэлтгэх ажлыг тасгийн эрхлэгч Д.Дарь хавсран хийж, энэ үүргийг нэр төртэй биелүүлж эмэгтэйчүүдийн тасгийг хөл дээр нь босгосон гавъяатай хүний нэг юм.
Төр засгаас түүнийг бүтээлч хөдөлмөрийг өндрөөр үнэлж “Сүхбаатарын одон”-оор хоёр удаа шагнаж байжээ.
Хүн амын нас баралтын үндсэн шалтгааны нэг болсон хорт хавдартай тэмцэх ажлыг зохион байгуулах арга зүйн төв болсон “Цацраг туяа” эмнэлгийн үүрэг улам өсөж, 1964 онд эмэгтэйчүүдийн тасгийг 20 ортой болгон өргжүүлж эмэгтэйчүүдийн нарийн мэргэжлийн тусламж үйлчилгээний цар хүрээг нэмэгдүүлсэн байна. Энэ үеэс тус тасгийн эрхлэгчээр С.Дорж ажиллах болсон байна. С.Дорж тус тасгийн эрхлэгч, зөвлөх эмч, АУДС-н эх барих эмэгтэйчүүдийн тэнхимийн багшаар ажиллаж хавдар судлалын төвийн эмэгтэйчүүдийн тасгийг хөгжүүлэх мэргэжилтэй боловсон хүчин бэлтгэх ажилд чухал үүрэг гүйцэтгэсэн багш юм.
Хорт хавдрын өвчлөл, нас баралт нэмэгдэж байгаатай холбоотой хорт хавдартай тэмцэх асуудлыг төр засгаас онцгойлон анхаарч байсны үр дүнд “Цацраг туяа” эмнэлгийн орыг нэмэгдүүлж боловсон хүчнээр хангах асуудлыг дэс дараалалтайгаар шийдэж байсны үр дүнд 1970 онд эмнэлгийн орыг 110-аар нэмэгдүүлсэнтэй холбоотойгоор “Эмэгтэйчүүдийн тасаг”-ийг 35ортой бие даасан тасаг болгон өргөжүүлсэн байна. Энэ үед хавдартай өвчтөнийг хэвтүүлэн мэс засал, туяа эмчилгээ хийхийн зэрэгцээ, хот, хөдөөгийн хүн амын дунд хорт хавдрыг эрт илрүүлэх үзлэг хийх байнгын бригад зохион байгуулагдаж жил бүр олон арван хүнийг хамруулж эмнэлгийн тусламж үзүүлж байжээ.
1983 онд Хавдар судлалын шинэ төв ашиглалтанд орсноор “Эмэгтэйчүүдийн тасаг” 60 ортой болон өргөжижулмаар 1986 онд тус тасагт 8 ор нэмж 68 ортой болгон, тасгийн эрхлэгчээр Ц.Янжин, ахлах сувилагчаар Б.Батдулам, их эмчээр Б.Оюунбилэг, Ц.Өлзийбат, Н.Төгсжаргал нарыг томилж, нийт 13 сувилагч, 12 асрагчийн орон тоогоор ажиллуулах болсон билээ. Тус тасгийн эрхлэгчээр олон жил үр бүтээлтэй ажилласан Ц.Янжин эмч эмэгтэйчүүдийн хавдар судлалын мэргэжлээр олон эмч дагалдуулан сургасан багш эмч хүн юм. Түүний бүтээлч хөдөлмөрийг төр засгаас өндрөөр үнэлж Монгол Улсын Гавъяат эмч цолоор шагнасан юм.
1989 онд “Эмэгтэйчүүдийн тасаг” нь 40 ортой эмэгтэйчүүдийн мэс заслын, 30 ортой радиологи-гинекологийн хэсэгт хуваагдан ажиллаж байжээ. 1997 оны 5 сарын 19-нөөс тус тасаг нь эмэгтэйчүүд ба урьдал өвчнийг эмчлэх тасаг нэртэйгээр 58 ортой ажиллах болсон байна.
Эмэгтэйчүүдийн мэс заслын тасагт ахмад эмч Д.Дарь, Ц.Хашдорж, АУ-ны доктор С.Дорж, МУ-ын Хүний Гавъяат эмч Ц.Янжин болон Б.Ариунболд, Д.Янжмаа, Ц.Өлзийбат, С.Мөнхбат, Д.Батбаяр, Б.Оюунбилэг, Г.Баярсайхан, Д.Өлзийбаяр, Д.Сувдмаа, Г.Лхагважаргал нарын эмч нар үр бүтээлтэй ажиллаж байжээ.
Дээрх хугацаанд тус тасагт ээлжийн сувилагчаар Б.Маша, н.Оюун, н.Нарантуяа, Б.Бүдмаа, И.Амаржаргал, Л.Энхбаяр, Г.Энхтүвшин, Н.Төгсжаргал, Бу.Уранчимэг, Ц.Болормаа, Б.Ганчимэг, Ш.Мөнхцэцэг, Да.Болормаа, Б.Байгалмаа, Э.Дашбалжид, До.Болормаа, Д.Бадамханд, Б.Солонго, Х.Эрдэнэжаргал, эмчилгээ, боолтын сувилагчаар н.Бямбасүрэн, Ш.Түвшинжаргал, Х.Алтанчимэг, С.Мядагмаа, Б.Энхбаяр, Ч.Дашиймаа нар, туслах ажилтнаар И.Цагаанчулуун, Б.Баасанжав нар тус тус ажиллаж байна.
Одоогийн байдлаар тус тасаг нь хэвтүүлэн эмчлэх, эмчилгээ үйлчилгээний 25 ортойгоор зөвлөх эмч, тасгийн эрхлэгч болон 5 их эмч, ахлах сувилагч, ээлжийн болон боолтын нийт 8 сувилагч, 1 туслах ажилтны бүрэлдэхүүнтэйгээр эмэгтэйчүүдийн байрлалын хорт хавдрын орчин үеийн өвөрмөц эмчилгээг улсын хэмжээнд үзүүлж байна.